Наадмыг 2,9 тэрбум төгрөгөөр зохион байгуулна


2018-05-30 14:58:48 0

Сэтгүүлч Н.Уранхолбоо

   Энэ жилийн Үндэсний их баяр наадмын төсвийг Засгийн газраас баталлаа. Тодруулбал, Ардын хувьсгалын 97 жил, Тулгар төрийн 2227, Их Монгол улс байгуулагдсны 812 жилийн ойг хоёр тэрбум 981 сая төгрөгөөр зохион байгуулахаар болов. Уг мөнгөний 500 сая төгрөгийг Нийслэлийн Засаг даргын Нөөц хөрөнгөөс гаргахаар болжээ. Харин баяр наадмын үйл ажиллагаанаас 390 сая төгрөгийн орлого олохоор төсөөлсөн байна. Ямартаа ч өнгөрсөн жилийн баяр наадмын төсвөөс 59 сая төгрөгөөр бууруулсан дүнг ийн баталлаа. 

Дашрамд дурьдахад наадмын нээлт, хаалт, төрийн хүндэтгэлийн концертын ерөнхий найруулагчаар Төрийн соёрхолт Н.Наранбаатар, ерөнхий продюссерээр Үндэсний урлагийн их театрын захирал Урлагийн гавъяат зүтгэлтэн Г.Цогтгэрэл ажиллах юм. 

Өнгөрсөн онуудад буюу 2010 онд 642.2 сая, 2011 онд 1,3 тэрбум, 2012 онд 870 сая, 2013 онд 1,5 тэрбум, 2014 онд 2,4 тэрбум, 2015 онд 2,7 тэрбум, 2017 онд 3 тэрбум 45 сая төгрөгийг наадам зохион байгуулахад зарцуулж байсан аж.