Путин эдийн засгийн том зорилт дэвшүүллээ


2018-05-09 09:20:57 0

   Владимир Путин эрүүлийг хамгаалах, боловсролын салбарт асар их зардал гаргах замаар амьдралын нөхцлийг эрс сайжруулж, ОХУ-ын зогсонги эдийн засагт шинэ эрч хүч өгөх амлалттайгаар Ерөнхийлөгчийн шинэ засаглалаа эхлүүллээ. Дахин зургаан жил Ерөнхийлөгчөөр ажиллах тангараг өргөснөөсөө хойш хэдхэн цагийн дараа ноён Путин шинэ зарлигт гарын үсэг зурлаа. Засгийн газар шинжлэх ухаан, технологи, нийгэм, эдийн засгийн үсрэнгүй хөгжилд чиглэн ажиллах ёстойг уг зарлигт заажээ.

Ерөнхийлөгчийн төлөвлөгөө тодорхой бус, популист шинжтэй, зарим нь үл гүйцэлдэх санаа агуулж байгааг шинжээч өгүүлсэн юм. Засгийн газар улс орныг хөгжүүлэх найман зорилтот төлөвлөгөөг Ерөнхийлөгчийн хугацаа дуусах 2024 он гэхэд хэрэгжүүлэх ёстойг ноён Путин онцолжээ. ОХУ-ыг дэлхийд эдийн засгаар тэргүүлэгч гол таван улсын нэг болгох, ядуурлыг одоогийн түвшнээс 50 хувиар багасгах зэрэг зорилт уг төлөвлөгөөнд багтаж байна.

Орос орон хүн амын өсөлтөө тогтвортой хадгалах, үйлдвэрлэлийн бүтээмж, технологийн инновацийг хурдацтай өсгөх шаардлагатай хэмээн тэрбээр тайлбарлаж байна. Ноён Путиний төлөвлөгөө нь Орос оронд айл өрхийн бодит орлого багасаж, хөрөнгө оруулалт буурсан нь нийгмийн тогтворгүй байдал үүсэх эрсдэлтэйг Кремль ухамсарлаж буйг харуулав. “Зарлиг нийгмийн зардлыг өсгөх олон амлалтад тулгуурлажээ. Тэгсэн мөртөө шүүх засаглалын тогтолцоог өөрчлөх, өмчийн эрхийг хамгаалах, эдийн засагт төрийн оролцоог бууруулах зэрэг хөрөнгө оруулалтын орчныг сайжруулахад амин чухал заалт огт алга” хэмээн брокерын BCS компанийн эдийн засагч Владимир Тихомиров шүүмжиллээ. “Бодитой ажил хэрэгч хөтөлбөр биш, улс төрийн популист тунхаг болж” хэмээн тэрбээр онцлов.

Даваа гарагт Кремлийн ордны алтадмал гурван танхимд цугласан 5000 зочны өмнө ноён Путин Оросын ард түмний төлөө зүтгэж, иргэдийн эрх, эрх чөлөө, улс орны бүрэн эрхт байдлыг хамгаалах тангараг өргөлөө. Нийтээр таамаглаж байсанчлан ноён Путин эртний хамтрагч Дмитрий Медведевийг Ерөнхий сайдаар нэр заасан юм. Түүний сонголтыг ОХУ-ын парламентын доод танхим-Төрийн Дум мягмар гарагт батална. Ноён Путиний итгэмжит хүн, либерал эдийн засгийн шинэчлэлийг сахин хамгаалагч, Сангийн сайд Антон Силуанов албан тушаалдаа хэвээр үлдэхийн зэрэгцээ Ерөнхий сайдын орлогчоор ажиллана гэдгийг ноён Медведев мэдэгдлээ.

Уг томилгоотой уялдан ноён Путиний эдийн засгийн төлөвлөгөөг хэрэгжүүлэх ажлыг ноён Силуанов голлон хариуцах болж байна. Ноён Путиний нийгмийн зардлыг өсгөх амлалтыг юугаар санхүүжүүлэх вэ гэдэг ганц асуултыг ажиглагч нар тавилаа. “Холбооны төсвийн нэмэлт орлогыг улсын цар хүрээтэй хөтөлбөр хэрэгжүүлэхэд ахиу хуваарилах”-ыг даваа гарагт гаргасан зарлигаар Засгийн газарт үүрэг болгожээ. Чухам энэ заалт ОХУ-ын санхүүгийн шинэ зохицуулалттай харшилж байгаа.

Учир нь газрын тос, шатдаг хийн үнийн тодорхой хязгаараас давсан орлогыг Улсын нөөцийн санд (ОХУ-ын баялгийн сан) оруулах ёстой. Шинэ Засгийн газар газрын тосны үнийн босгыг 42 ам.доллараас 50 орчимд өсгөж, үүсэх зөрүүг нь нийгмийн зардалд хуваарилах нэг арга байж болохыг шинжээч нар тайлбарлав. “Газрын тосны үнэ баррел нь 75 ам.доллар болчхоод байгаа одоогийн нөхцөлд зөв арга” хэмээн ноён Тихомиров өгүүлэж байна. Ноён Путиний эдийн засгийн зөвлөх, Ерөнхийлөгчийн эдийн засгийн шинэчлэлийн стратегийг боловсруулахад оролцсон Алексей Кудрин ч мөн ижил бодолтой байна. Ноён Кудриний дэвшүүлсэн гол санал санаачилга багтаагүй Ерөнхийлөгчийн зарлиг урам хугалсан зүйл болж байгааг ОХУ- ын аж үйлдвэрийн группийн дээд албаны нэгэн эрхэм тайлбарлав.

“Хөрөнгө оруулалт татах шалтгаан болж чадах татварын шинэчлэл, тэтгэврийн насыг нэмэгдүүлэх гэх мэт бусад олон асуудлын талаар юу ч дурдсангүй” хэмээн тэрбээр шүүмжиллээ. Бүтцийн шинэчлэл өрнөх найдлага ноён Путинтэй хамт үлдэх багийн бүрэлдэхүүнээс шалтгаална хэмээн шинжээчид үзэж байна. “Кудрин хаа очихыг харах хэрэгтэй. Хэрвээ энэ хүн кабинетэд юм уу Ерөнхийлөгчийн захиргаанд дээд албанд үлдвэл өөрчлөлт өрнөх найдвар бий” гэцгээв. Ноён Путин гуравдугаар сарын Ерөнхийлөгчийн сонгуульд 76 гаруй хувийн саналаар ялсан нь хуучин ЗХУ-ын үеэс хойших удирдагчдын алинд ч байгаагүй үнэмлэхүй амжилт болсон юм. Сонгуулийн дүн нь дайчилгаа маягийн зохион байгуулалттай аяны үр дүн болохоос иргэдийн үнэнхүү дэмжлэгийг тусгасан хэрэг биш хэмээн улс төрийн зарим шинжээч үзэж байна.

Эх сурвалж: Засгийн газрын мэдээ сонин