Орон сууцны шинэ хөтөлбөр хэрэгжинэ


2018-02-14 15:57:28 0

Сэтгүүлч Н.Уранхолбоо

    Нийслэлийн гэр хорооллыг барилгажуулах зорилгын хүрээнд бага, дунд орлоготой, хөгжлийн бэрхшээлтэй, залуу гэр бүл, олон хүүхэдтэй, өрх толгойлсон эцэг, эхэд хөнгөлөлттэй нөхцөлөөр орон сууц олгох  асуудал нэн шаардлагатай байгааг Нийслэлийн Засаг даргын орлогч П.Баярхүү онцоллоо.  Нийслэлийн иргэдийг ая тухай, цэвэр орчинд амьдруулах үүднээс Орон сууц, дэд бүтцийг хөгжүүлэх дэд хөтөлбөр баталсан аж. Уг хөтөлбөрийн хүрээнд дээрхи зорилтод бүлэг рүү чиглэсэн орон сууцны шинэ бодлого явуулахаар төлөвлөжээ. 

Мөн шаардлага хангахгүй орон сууцыг дахин барилгажуулах, гэр хорооллыг дахин төлөвлөх, дэд бүтцийн төв байгуулах зэрэг ажлыг ирэх 2020 он хүртэл хийхээр төлөвлөсөн байна. Нийслэлийн хэмжээнд 1967-2000 он хүртэл барьсан нийт 1077 угсармал барилга байдгийн ихэнх нь дулаан, техник, ашиглалтын шаардлага хангахааргүй болжээ. Тиймээс эдгээр барилгуудад техникийн шинэчлэлийн ажлыг дахин шийх шаардлага үүссэн байна. 

Дашрамд дурьдахад Улаанбаатар хотын гэр хороололд одоогийн байдлаар 218,7 мянган өрх амьдарч байгаа аж. Үүнээс 1187 өрх түрээсийн орон сууцанд амьдарч байна. Энэ тоог мөн нэмнэ гэдгийг нийслэлийн удирдлагууд хэллээ.