“Боов” М.Оюунчимэг гурил тараав


2018-02-14 15:24:46 0

     УИХ-ын гишүүн, Өргөдлийн байнгын хорооны дарга М.Оюунчимэг өнгөрсөн жил Байнгын хорооны хурал дээр кофе ууж, боорцог идсэн бичлэг олон нийтэд цацагдаж баггүй шүүмжлэлд өртсөн. Үүнээс хойш түүнийг “боов” М.Оюунчимэг гэж нэрийдэх болсон. Саяхнаас мөн түүнтэй холбоотой шүүмжлэл өрнөөд байна. Өөрийн сонгогдсон Чингэлтэй дүүргийн иргэдэд гурил тараасан мэдээлэл байгаа юм. Үүнийгээ ч өөрөө үгүйсгээгүй байна.

Тэрбээр УИХ-ын Өргөдлийн байнгын хороо намрын чуулганы хугацаанд хийж, гүйцэтгэсэн ажлын тайлангаа өчигдэр тавих үедээ ахмадуудад гарын бэлэг өгсөн гэдгээ нуусангүй. М.Оюунчимэг гишүүн “УИХ-ын гишүүд бэлэг тарааж байна гэхээсээ илүү тойргийнхоо өндөр настай буюу 70-аас дээш настай  ахмадууддаа хүндэтгэл үзүүлсэн. Мэдээж бусад УИХ-ын гишүүд тойргийнхоо ахмадуудад хүндэтгэл үзүүлж байхад манай тойргийн ахмадууд ч гэсэн “бидэнд яагаад хүндэтгэл үзүүлэхгүй байна вэ” гэж бодно.  Иймээс ч хүндэтгэл үзүүлсэн. АН-ын гишүүд ч гэсэн боорцог тараагаад явж л байна. Бэлэг гэхээсээ хүндэтгэл гэж харах хэрэгтэй. Бүх гишүүд л ийм хүндэтгэл үзүүлж байгаа. Сүүлийн 20 жил явж ирсэн жишиг” гэсэн тайлбар өгөөд байна. Түүний гарын бэлэгт гурил, эд зүйл багтжээ.

М.Оюунчимэг гишүүн АН-ынхныг боорцог тараасан гэж мэдээлсэн бол, тойргийнхоо иргэдэд гурил тараасан түүнийг “Сар шинийн баярын өмнө боов хийх гурил тараалаа” гэж хошигнох нэгэн байна.