-“Нэг цэрэг-Нэг үндэстэн” бодлогыг мөрийн хөтөлбөртөө тусгажээ-

   Монгол Улсын Ерөнхийлөгчийн сонгуульд Ардчилсан намаас нэр дэвшигч Халтмаагийн Баттулгын сонгуулийн сурталчилгааны ажил Сүхбаатар аймгийн Баруун-Урт хотноо үргэлжилж байна. Нийт 13 сум, 55 мянга гаруй хүн амтай Сүхбаатар аймагт сүүлийн жилүүдэд бүтээн байгуулалтын ажил эрчимтэй өрнөж, аймгийн төв Баруун-Урт хот болоод сумын төвүүд өдрөөс өдөрт өргөжин тэлсээр байна. Нэр дэвшигч Х.Баттулга ЗТБХБ-ын сайдаар ажиллах байхдаа буюу 2011 тавдугаар сард шавыг нь тавилцсан Барилгын цэргийн 338 дугаар ангид зочилж, бие бүрэлдэхүүн, цэрэг дайчидтай уулзалт хийлээ. Биднийг Ангийн захирагч, хурандаа Д.Нямсүрэн, Штабын дарга, дэд хурандаа н.Гантөмөр нар хүлээн авсан юм.

Нэр дэвшигч Х.Баттулгын мөрийн хөтөлбөрт цэрэг арми, Батлан хамгаалах салбарыг хөгжүүлэх, Зэвсэгт хүчний бие бүрэлдэхүүний хөгжил, мэргэжлийн ур чадварыг дээшлүүлэх зэрэг олон заалт багтсан бөгөөд Зэвсэгт хүчний бие бүрэлдэхүүнийг улс орны бүтээн байгуулалтад татан оролцуулах тухай голлон тусгасан юм. Тэрбээр Баруун-Урт хотын Барилгын цэргийн 338 дугаар ангийн бие бүрэлдэхүүнтэй уулзах үеэрээ “Эх орны бүтээн байгуулалтад гар бие оролцож буй дайчин эрс та бүхэнд амжилт хүсье.

Өндөр хөгжилтэй зарим улс орон бүтээн байгуулалтын ажилд цэрэг армиа татан оруулж, богино хугацаанд хөгжингүй орон болсон бодит түүх, жишээ олон бий. Миний мөрийн хөтөлбөрт тусгагдсан энэ тухай илүү дэлгэрнгүй тусгасан байгаа. Та бүхэн ч сонссон болов уу. “Нэг цэрэг-Нэг үндэстэн” хөтөлбөрийн хүрээнд үүнтэй ижил зарчмаар бүтээн байгуулалтын ажил өрнүүлэх юм. Цэргийн насны залуус сайн дураар хамрагдаж, цалинтай ажиллахын зэрэгцээ давхар мэргэжил эзэмших, мэргэших цаашлаад алба хааж дуусахдаа байртай, дансандаа хадгаламжтай халагдах бүрэн боломжтой. Эх орны өмнө хүлээсэн үүргээ гүйцэтгэж, бүтээн байгуулалтад гар бие оролцож буй та бүхэн бол энх цагийн эх орончид юм шүү, баярлалаа” гэв.

Ардчилсан намын сонгуулийн штаб