Хилчин хотхоныг инженерийн шугам, сүлжээнд холбоно


2017-11-14 23:19:01 0

    Сэтгүүлч Н.Уранхолбоо

 УИХ-ын Өргөдлийн байнгын хороо Сонгинохайрхан дүүргийн 30-р хорооны нутаг дэвсгэрт байрлах гэр хорооллын Хилчин хотхоны 168 айлыг тусгайлсан дэд бүтэц бүхий инженерийн шугам, сүлжээнд холбох асуудлаар хэлэлцүүлэг зохион байгууллаа. Тодруулбал, Цамбагаравын арын дэнжид байрлах уг хорооллыг өмнө нь шугам, сүлжээнд холбохоор 4,5 тэрбум төгрөг төсөвлөж зарцуулсан ч дорвитой ажил хийгдээгүй гэсэн шүүмжлэлд өртөөд буй. Энэ талаар УИХ-ын гишүүн Ц.Гарамжав "Хилчин” хотхон гэр хорооллын дахин төлөвлөлт, газрыг шинэчлэн зохион байгуулах ажлын хүрээнд амины орон сууц бүхий жишиг хороолол болох ёстой байсан. Тэнд амьдардаг 168 өрхийн 672 иргэн дахин төлөвлөлтийн төслийг дэмжсэн.

Төслийн хүрээнд 168 айл, өрхийг цэвэр, бохир усны инженерийн шугам сүлжээнд холбох, хашаа, авто зам, гэрэлтүүлэг, тохижилт зэрэг цогц ажлыг гүйцэтгэх үүрэгтэй байсан. Харамсалтай нь эдгээр айлын нэг нь ч одоог хүртэл цэвэр, бохир усны шугам сүлжээнд холбогдоогүй, халаалтгүйгээс тав тухгүй амьдарч байгаа талаар удаа дараа өргөдөл ирүүлсэн тул бид Өргөдлийн байнгын хороон дээр холбогдох албан тушаалтнуудыг оролцуулан хэлэлцүүлэг зохион байгуулж, асуудлыг шийдвэрлэхийг зорьж байна" гэсэн юм. 

    Инженерийн хэсэгчилсэн шугам, сүлжээнд холбосноор Хилчин хотхоны халуун хүйтэн ус, халаалттай тохилог амины орон сууцны хороолол болох аж. Төслийг "Монгол дайвин" ХХК гүйцэтгэхээр шалгарчээ.